पर्सा । सशस्त्र प्रहरी बल नेपाल, नम्बर १३ गण हेडक्वार्टर पर्सामा कार्यरत एसपी पुरनचन्द्र भट्टले सादा पोशाकमा परिचालन गरेका घुमुवा जवान रामराज यादवलाई काठमाडौंस्थित हेडक्वार्टर तानिएको छ।
पाँच–छ वर्षदेखि पर्सामा कार्यरत यादव संगठनको नीति विपरीत लामो समय एउटै जिल्लामा बसेर अवैध असुली र तस्करीमा संलग्न रहेको गुनासो तथा उजुरी हेडक्वार्टर पुगेपछि उनलाई तानिएको हो ।
घुमुवा यादव तानिए पनि एसपी भट्टका प्रमुख सहयोगी र घुमुवा कमान्डर, सशस्त्र प्रहरी निरीक्षक दिपेन्द्र प्रकाश मल्ल अझै पर्सामा असुली कार्यमा परिचालन भइरहेको छ ।
आईडी नं. ३०७७ भएका प्रहरी निरीक्षक मल्ल हाल सशस्त्र प्रहरी बल, नेपाल नं. ४६ गुल्म हेडक्वार्टर डोल्पामा सरुवा भइसके पनि स्रोतका अनुसार भट्टले उनलाई 'काजमा राखेर' पर्सामा असुलीमा परिचालन गरिरहेको स्रोत बताउँछ ।
पर्सा गणमा रहेका घुमुवा जवान रामराज यादव एसपी भट्टको निर्देशमा स्थानीय तस्करहरूसँग मिलेर ठूलो रकम असुली तथा तस्करीमा संलग्न भएको विवरण आएको छ। घुमुवा यादव पर्साका स्थायी बासिन्दा हुन् ।
स्रोतका अनुसार यादवलाई 'सेटिङ मिलाउने व्यक्ति' भनेर चिनिन्छ। संगठनको नीति विपरीत लामो समय एउटै जिल्लामा रहेकाले उनलाई हेडक्वार्टर तानिएको हो।
विगतमा पनि सशस्त्र प्रहरी बल नेपाल, नम्बर २ छिन्नमस्ता बाहिनी मधेस प्रदेशका तत्कालीन बाहिनीपति सशस्त्र प्रहरी नायव महानिरीक्षक कालिदास धौवजी कहाँ यादवको विरुद्ध धेरै उजुरी तथा गुनासो पुगेपछि घुमुवा यादवलाई धनुषा लखेटेका थिए ।
तर डिआईजी सरुवा भएपछि यादव पुनः पर्सामा फर्केर अवैध कारोबार सञ्चालन गर्न सफल भएका थिए। स्रोतका अनुसार, एसपी भट्टले पर्सा गणमा दर्जनौं घुमुवा परिचालन गरेका थिए। घुमुवाहरुले तस्करहरूसँग मोटो रकम असुली गर्ने, तस्करीको लाइन सञ्चालन गर्ने तथा स्थानीय व्यापारीलाई धम्क्याउने कार्यमा संलग्न रहेको खुलेको छ।
भट्टमाथि भन्सार छली, चोरी तथा तस्करी नियन्त्रणमा असफल भएको आरोप लगाइएको छ। सशस्त्र प्रहरी बलले घुमुवा प्रणाली अन्त्य गर्ने नीति लिएको भए पनि पर्सास्थित १३ नम्बर गणका गणपति भट्टले नीति विपरीत घुमुवा राखेर अवैध असुली र तस्करी सञ्चालन गरेको देखिएको छ ।
एसपी भट्टलाई तत्कालीन गृहमन्त्री रमेश लेखकको सिफारिसमा महोत्तरी गणबाट पर्सा गणमा इन्चार्ज–टु–इन्चार्ज सरुवा गरिएको थियो ।
महोत्तरीमा पाँच महिना मात्र कार्यरत रहेपनि पर्सामा आएका उनी स्थानीय तस्करी नेटवर्कसँग जोडिएर अवैध असुलीमा संलग्न भएको आरोपमा हेडक्वार्टरले सोधपुछ थालेको स्रोत बताउँछ । अनलाइन नेपाल
प्रतिक्रिया