जनकपुरधाम । मिथिला बिहारी नगरपालिका–९ का वडाध्यक्ष विन्देश्वर यादवको हत्या जग्गा विवादका कारण भएको प्रहरीले जनाएको छ ।
नेकपा एमालेको वडा कमिटी अध्यक्ष रहेका धर्मनाथ यादव र वडाध्यक्ष यादवबीच जग्गाका विषयमा शुक्रबार साँझ विवाद भएको थियो । मृतक वडाध्यक्ष यादव २०७४ मा जसपाका तर्फबाट र २०७९ मा स्वतन्त्र उम्मेदवार भई निर्वाचित भएका थिए । निर्वाचित भएको केही समयपछि एमालेमा प्रवेश गरेका थिए । एकै पार्टीमा र घर पनि सँगै रहे पनि जग्गा विवादका कारण उनीहरुबीच सम्बन्ध राम्रो थिएन ।
जिल्ला प्रहरी प्रमुख एसपी रुगमबहादुर कुँवरका अनुसार स्थानीय दुःखी यादवको मृत्यु संस्कारअन्तर्गत १० दिनको प्रसाद ग्रहण गर्ने कार्यक्रममा आपसी झैझगडा भएको थियो । त्यसक्रममा झगडियामध्येका एकजनामाथि कुटपिट हुँदा झगडा अरु चर्किएको थियो । त्यसक्रममा एमाले वडा कमिटीका अध्यक्ष यादव पक्षले गाउँबाट अन्य व्यक्ति जम्मा पारेर वडाध्यक्ष यादवमाथि सांघातिक आक्रमण गरेका थिए । त्यसक्रममा लठ्ठी, भाँडाकुँडा हुँदै होममेड कटुवा पेस्तोलले वडाध्यक्षको छातीमा प्रहार गरिएको थियो ।
गोली प्रहार गर्ने नेपाल प्रहरीका सहायक हवल्दार शम्भु यादव हुन् । उनी जिल्ला प्रहरी कार्यालय, सप्तरीमा कार्यरत रही पाँच दिनको घर बिदामा त्यहाँ पुगेका थिए ।
एमाले वडा कमिटी अध्यक्षको जग्गा विवाद अदालतमा विचाराधीन छ । मुद्दा विचाराधीन भएकै अवस्थामा सरकारी जमिन ओगटेर बाटो खोलिएको र मुद्दा विाचाराधीन रहेको जग्गामा वडाध्यक्ष यादवले घर निर्माण गर्न अनुमति दिएको विषयमा विवाद भएको थियो । गोली प्रहारका कारण वडाध्यक्ष यादवको घटनास्थलमै मृत्यु भएको प्रहरीले जनाएको छ । त्यहाँबाट पेस्तोल र त्यसमा प्रयोग हुने गोली बरामद भएको छ । गोली प्रहार गर्ने सहायक हवल्दार यादव जिल्ला प्रहरी कार्यालय, धनुषाको हिरासतमा छन् । नेपाल प्रेस
प्रतिक्रिया