काठमाडौं। करिब तीन वर्षदेखि उडान बन्द रहेको गुण एयरलाइन्सले नेपाल नागरिक उड्डयन प्राधिकरण (क्यान)लाई साढे ३ करोड रुपैयाँ बुझाउन बाँकी देखिएको छ।गुणले त्रिभुवन विमानस्थल र अरु १० विमानस्थललाई ३ करोड ४७ लाख ३९ हजार रुपैयाँ बुझाउन बाँकी रहेको देखिएको हो। त्यसमध्ये सबैभन्दा धेरै ३ करोड १२ लाख २७ हजार रुपैयाँ त्रिभुवन विमानस्थललाई बुझाउनुपर्ने रकम हो।
यस्तै गौतम बुद्ध विमानस्थललाई ८ लाख १० हजार, पोखरा विमानस्थललाई ८ लाख ५९ हजार, नेपालगन्ज विमानस्थललाई ९२ हजार, सिमरा विमानस्थललाई ७० हजार, जनकपुर विमानस्थललाई ३८ हजार, भरतपुर विमानस्थललाई ७२ हजार, विराटनगर विमानस्थललाई ७ लाख ७२ हजार, लुक्ला विमानस्थललाई २ लाख ४२ हजार, सिमकोट विमानस्थललाई १ लाख ८५ हजार र तुम्लिङटार विमानस्थललाई ३ लाख ६७ हजार रुपैयाँ बक्यौता तिर्न बाँकी रहेको क्यानका सूचना अधिकारी ज्ञानेन्द्र भुलले जानकारी दिए। आर्थिक संकटका कारण गुणले २०७९ फागुन १ गतेदेखि उडान बन्द गरेकामा पाइलट र कर्मचारीलाई तलब नदिएको भन्दै क्यानले फागुन ८ गते कम्पनीका सबै जहाज ग्राउन्डेड गरिदिएको थियो। त्यसयता गुणले उडान सञ्चालन गरेको छैन।
गुणले क्यानसँग अहिले उडान सञ्चालन अनुमति (एओसी) मागेको छ।
कम्पनीसँग ५ वटा जेटस्ट्रिम र २ विचक्राफ्ट रहेकामा सुरुमा विचक्राफ्टमार्फत मात्र उडान गर्ने योजना छ। कम्पनीले जेट स्ट्रिम जहाज बेच्न चाहेको छ। गुणले जेटस्ट्रिम जहाज २०७८ मा यती एयरलाइन्ससँग किनेको थियो।
प्रतिक्रिया